.
.....
قصة زريف الطول من تراثنا الفلسطيني
بعد آن ضمنتها بعض الأحداث الأخيرة
فما قصة زريف الطول ؟؟؟
من هو زريف االطول .......
زريف الطول كان نجار ..وغريب عن.. القريه ..كان اسمه فلسطيني ..بس طوله كان سبب اسمه ... خلوق ما برفع عينه في امرأه ...وكان أبو حسن يعطيه أجره كل أسبوع ..وماكان يعرف وين بروح فيه ...بنات القريه بغزلوا حواليه وهو ولا هوه هون ..مرت المختار فصلت نمليه ..مشان تلفت نظره لبنتها...وام خليل مرت خطيب القريه فصلت عندو صندوق (اواعي) وحكتلو عن بنتها ..حتى الخطيب ..في خطبة الجمعه لمح للموضوع بس ما في فايده...زريف الطول مش تبع نسوان.....في يوم هجموا قطعان الصهاينة على القريه .
واستشهد 3 شباب ...ثاني يوم غاب زريف الطول ..ورجع بعد 4 ايام ..رجع بالليل ..ما حدا شافوا ...بعد شهر رجعت قطعان عصابات الصهاينة ...كان زريف الطول مشتري ..5 بواريد...وزعهن على شجعان القريه ..قتلوا 6 صهاينة ...ثاني يوم القريه قامت وقعدت..النسوان باعن ذهبن..مشان الشباب تشتري بواريد ..وصاروا يغنوا..:
.يا عربي يا ابن المقرودة
بيع امك واشتري بارودة
والبارودة خير من امك
يوم الحرب تفرج همك...
رجعت القطعان توخذ بالثأر ...وحصلت معركه مثلها ماصار..هرعوا الناس كبار صغار ..وفي كروم التفاح .ريح الثوره نسم وفاح...استشهد شباب كثير ..بس خسائر القطعان أكثر ...جمعوا الشهداء ..زريف الطول مش معهم ..وزريف الطول مش مع اللي بقوا ...بس الكل حلف يمين انو شاف زريف الطول قتل أكثر من 20 صهيوني ..وكان يطخ ببارودتين..وهو اللي سحب عمار وجهاد أولاد الأرملة من ساحة المعركه وهم جرحى والرصاص زي زخ المطر فوق رأسه ...طول الليل القريه دورت بالمشاعل على زريف الطول ..مابين الو أثر ...ومرت الأيام ..وصار زريف الطول اغنية القريه ...
يا زريف الطول وين رايح تروح بقلب بلادنا تعبقت الجروح
يا زريف الطول وقف تاقولك رايح عالغربه وفلسطين احسنلك..
بعدها بخمس سنين إبراهيم الحلاق حلف يمين انو شاف زريف الطول مع عز الدين القسام في احراش يعبد ..وجهاد ابن الأرملة بقول شافو مع الحنيطي بدرب الثوار بيافا..اكيد مهو مش غشيم عنو ...وكثير ناس حلفت انو كان ببورسعيد مع جول جمال ..وعلى الوصف ناس شافوه بالكرامه على نهر الأردن بفجر دبابة بعد ما قطعت النهر .
و بعدها بست .. بعام ال٧٣
بحرب تشرين كان مرابط بتل الحارة اهل الحاره كلهم شافوه كان مستني قطعان الصهاينة على راس التل لحتى يقتل منهم و راح على سينا .. مشان يقتل الصهاينة
و لما وقفت الحرب على جبهة سينا رجع عالجولان بحرب الاستنزاف يصول و يجول و يطخ بالبارودة
و كل اهل القنيطرة .. شافوه و كان مع حافظ اسد لما رفع العلم بالقنيطرة
..وكان بسوق الغرب في اجتياح بيروت .
مع الفدائية و راح عالجنوب و صار يدخل على الخليل يودي سلاح و كان مع المقاومة بجنوب لبنان .. زريف الطول موجود بكل مكان بعمروا ما قعد و لا هان
..بس آخر مره شافوه..كان بغزه..طلع للقطعان من نفق ..رمى صليت صواريخ على تل أبيب ورجع على الخندق ..
و بعدها بسنين لما قطعان الصهاينة و العرب يلي تصهينوا تأمروا على الشام مشان يقتلوا قضية فلسطين بالشام . زريف الطول ما هانلوا بالشام
ابو صياح حلف مية يمين انو شافو
و قلوا مو انت زريف الطول الفلسطيني .شو جايك لهون
قلو اجيت ادافع عن فلسطين بالشام
ترى القطان بيناتكم صاروا بدهم يقتلو فلسطين بالشام ... و قتها صاح ابو صياح و معو ابو عنتر و صاح معهم زريف الطول " يا باطل منموت كلنا و ما بتموت فلسطين " .احنا و ولادنا و نسوانا كلنا لفلسطين ... و بعد ما اطمن على فلسطين بالشام .. ركب على حصان ابيض و طار الحصان . وقتها طلعت كل صبايا الشام تغني و تنشد :
يا زريف الطول وين رايح تروح
بقلب بلادنا تعبقت الجروح
يا زريف الطول وقف تاقلك
رايح عالغربة و فلسطين احسنلك
يا زريف الطول الله و النبي معك
بعدنا على العهد الله يسرلك
خلك معانا يا خشف
خلك معانا خلك
يا دمع عيني ما نشف
بكرى الحكايا بتنكشف
خلك معانا خلك
يا فلسطيني الروح بترخصلك
خلك معانا خلك
بكرى الحكايا بتنفضح
وانت غالي علينا
و أنت غالي علينا
ترى احنا عالعهد والله ما نسينا
و يلي تأمر وخان
بكرى بينفضح
و على جهنم بينصرف
زريف الطول كل مقاوم وكل ايد قابضه على السلاح وسبابتها على الزناد ...
بعرف ..في سؤال ؟؟؟هو زريف الطول ما بموت ...
ليش هو الفلسطيني بموت !!!!
و لو مات بكل مكان
بس الفلسطين زريف الطول
ما بموت بالشام
لأنو إذا مات بالشام ( و لن يموت )
ماتت كل الاوطان
محمد عبد اللطيف الحريري
.........................
تحياتنا للشاعر
مسؤول التوثيق الشاعرة هيفاء علي خدام
مديرة الملتقى الشاعرة وديعة درويش
ليست هناك تعليقات:
إرسال تعليق